Desde o ano 2009 e ata hoxe, facilito obradoiros de Terapia do Reencontro, ás veces convocados por min e ás veces por petición de concellos, CIMs ou asociacións diversas. Ofrezo tamén acompañamento individual e de parellas en Compostela e en Ponte Caldelas (Pontevedra) onde resido.

Para min está sendo un regalo poder acompañar o crecemento de persoas empeñadas nunha vida feliz e de Botrato. Eu tamén me sinto nese mesmo empeño… Unha muller en camiño, habitada polo desexo de emancipación. Unha muller feminista que soña con eses outros mundos posibles e quere contribuír a que se vaian facendo realidade na sociedade, nas relacións e tamén na intimidade do fogar e da cama. Unha muller basicamente en paz e feliz, que está aprendendo a gozar e a compartir toda esa abundancia regalada.

Cóntoche algo de min… Nacín na vila de Chantada (Lugo) no verán de 1961. Aos cinco anos marchei vivir á banlieu parisiense, onde me criei ata os 17 anos. Licencieime en Ciencias Políticas e Socioloxía en Euskadi (Universidade de Deusto, 1985) e posteriormente, levada por unha forte atracción pola aldea, decidín asentarme en Romaríz (Abadín – Lugo) onde vivín durante 15 anos. A miña dedicación profesional centrouse daquela no traballo comunitario coa xente labrega, que máis adiante compaxinei co traballo con familias desestruturadas (Fundación Meniños, 1994-2001).

A convivencia intermitente coa xente q´eqchí de Altaverapaz (Guatemala) remitiume ao sentido fondo da existencia e a unha espiritualidade da vida e da terra; levándome a cursar o III Seminario de Acompañamento Espiritual en Salamanca (1998-1999).

Desde o ano 2002, desenvolvín a miña actividade profesional no Sindicato Labrego Galego en tarefas de formación e organización interna. E, co obxectivo de dispoñer de máis ferramentas, decidín formarme máis adiante en Estudos de Xénero (Universidade de Vigo, Posgrao 2008), e en Terapia do Reencontro (Universidade de Alcalá de Henares, 2008-2009).
Despois de experimentar a Terapia de Reencontro como algo transformador, decido formarme nesa metodoloxía como profesional (2010-2012).

Posteriormente, participo no grupo de Formación Continuada e Supervisión (2012-2018), e máis adiante entro a formar parte do Equipo de Formación do Instituto de Terapia de Reencontro (2021-2023).

Para saber máis de min, podes entrar en reencontrogaliza.wordpress.com