A Terapia do Reencontro chegou a min a través da participación nun Obradoiro de Autocoñecemento para o Cambio. Intereseime pola visión integral que ofrece da persoa non só no teórico senón tamén a través dunha metodoloxía propia, concibindo o desenvolvemento humano dende o individual, o social, o espiritual e o comunitario. Alén disto, puiden ver que se fundamenta nunha visión crítica da sociedade pretendendo construír modos de relación máis igualitarios da persoa consigo mesma, coas outras persoas e co mundo. E finalmente o “ser natureza”, o vínculo da persoa co universo como unha forma máis de vida que debe recuperar o seu lugar como ser integrante, e non como ser dominante. Por todo isto, a Terapia do Reencontro permitiume o reencontro coa Psicoloxía, ofrecéndome un lugar coherente dende onde asentar a miña práctica profesional máis tamén, dende onde estar, pensar e sentir o mundo que nos rodea.
O meu labor profesional percorre diferentes ámbitos do terceiro sector ao longo de máis de vinte anos. Dende a investigación social, a participación, a cooperación, a saúde comunitaria e actualmente, encóntrome traballando no ámbito da saúde mental e a diversidade. O nexo común da miña práctica é o acompañamento de procesos de cambio e de desenvolvemento individuais e colectivos, coa ilusión de contribuír nalgunha medida a unha sociedade máis xusta e igualitaria.
A día de hoxe, interésanme os procesos participativos coidadosos coas persoas e a contorna na que vivimos e síntome na busca e na creación de oportunidades e alternativas de vida en comunidade. A relación coas orixes sociais e culturais, aquelo que cambia e aquelo que permanece, aquelo que amamos e aquelo que rexeitamos. A desvinculación coa Vida, a relación cos seres vivos e os seres inertes, o mundo natural e o mundo artificial.. todas estas son cuestións que sinto van marcando o meu camiño actual sen rumbo fixo e sen porto de chegada.