Tiven a sorte de nacer e criarme en comunidade, coidada e arroupada pola seguridade e cariño da xente de Muimenta, no corazón da Terra Chá. Os ciclos da natureza, as herbas, a familia afectiva, o amor polos animais, as lendas, as ruadas, a morte, o compromiso co colectivo, o respecto polo que xa estaba antes ca min ou a loita polos recursos básicos sempre estiveron comigo. Co paso dos anos e transitando moitos lugares aprendín que ser e formar parte dese rural me aporta moita identidade, sendo o paradigma dende o que me abro ao mundo.

Iniciei os meus estudos académicos na Universidade de A Coruña cursando a Diplomatura de Educación Social, posteriormente combinei os estudos de Psicopedagoxía co Máster en Asesoramento e Orientación Familiar na Universidade de Santiago de Compostela, onde posteriormente acabei adquirindo o título de Terapeuta Familiar Sistémica. Nesa mesma universidade tamén fixen o Curso de Especialidade en Educación Emocional e voltando á UDC cursei o Máster Universitario en Profesorado de Educación Obrigatoria e Bacharelato, Formación Profesional e Ensinanza de Idiomas. Curiosa e crítica de nacemento, sempre na procura de comprender e descubrir o complexo das persoa, fixen outras moitas formación non académicas pero si máis vivenciais e, sobre todo, con metodoloxías transformadoras como foron a Diplomatura de Transformación de Conflitos a través do Xogo e a Arte, Educación Menstrual e Xinecoloxía Autoxestiva, Sexualidade e Mindfullness, Prácticas Restaurativas, Acompañamento Emocional a través de libros ilustrados e un longo etc.

Aventureime na Terapia do Reecontro nunha busca de transformación persoal e necesidade profesional de achegarme a un marco teórico humanista e con perspectiva de xénero. Esta formación aportoume unha ollada holística cara as persoas e cara o mundo que habitamos, o que me da unha gran perspectiva para acompañar desde unha mirada compasiva e coidadosa, pero sobre todo, tamén me axuda a non perderme, a parar e aprender a estar no adentro conectándome co pracer e a saúde, a coidarme para poder estar en armonía co afora.

Creo no colectivo e nos movementos sociais como canles de crecemento e transformación das realidades, por iso formo parte de diferentes proxectos como Fiadeiras (Grupo de Feminismos do Colexio de Educadores e Educadoras Sociais de Galicia), XOTRAMU e Observatorio do Patrimonio Lúdico Galego, Aselafem (Estudos Laborais Feministas) ou da ONG Implicadas no Desenvolvemento. Enrédome e nútrome do dinamismo e creatividade da xente de Muimenta facendo posible organizar diferentes manifestacións culturais e artísticas como o festival POZOMOURO.

Son socia traballadora da cooperativa AtalaiAS xunto con Raquel Veiga. A miña vida profesional está vinculada á creación de proxectos sociais e educativos encamiñados a fomentar o botrato tanto nas relacións coas demais persoas, como cara nós mesmas. É dicir, buscando estratexias individuais e colectivas que transforme a sociedade cara un modelo de relación máis xusto e igualitario. Se queres saber un pouco máis do que fago visita: www.atalaias.gal

En definitiva, síntome como o carballo de Morán, moi enraizada á terra e coa cabeza nas pólas cheas de páxaros libres e diversos que van pero sempre volven.